Kryetarja Ardita Sinani apelon për mbështetje ndërkombëtare dhe kushtëzimin e integrimit të Serbisë në BE me respektimin e të drejtave të shqiptarëve në Preshevë, Medvegjë dhe Bujanoc!

Gjatë intervistës me Kryetaren e Komunës së Preshevës, Ardita Sinani, folëm për sfidat kryesore që përballen shqiptarët në Preshevë. Ajo i adresoi këto çështje përmes valëve të Radio Helsinki 92.6, në programin në gjuhën shqipe në Graz. Diskutuam për fuqizimin e diasporës në mbështetje të Luginës së Preshevës, për nismat lokale për zhvillim ekonomik, për rolin e të rinjve në të ardhmen e qytetit të Preshevës, si dhe për bashkëpunimin me Republikën e Kosovës dhe atë të Shqipërisë. Ajo theksoi sfidat që përballen shqiptarët për shkak të diskriminimit të vazhdueshëm dhe shkeljes së të drejtave nga autoritetet e Serbisë.

Biseda u zgjerua edhe për projektet në fushën e kulturës, rinisë, sportit dhe trashëgimisë kulturore shqiptare, të cilat po ndihmojnë në ruajtjen e identitetit kombëtar. Në përgjithësi, në Luginën e Preshevës ndalohen simbolet kombëtare si flamuri kombëtar në ndërtesat publike, ndërsa disa lëndë mësimore si historia dhe gjeografia janë të ndaluara të mësohen në shkollat fillore dhe të mesme, gjë që përbën shkelje të të drejtave të njeriut dhe të pakicave kombëtare në Serbi.

Kryetarja Sinani ka zhvilluar takime me anëtarë të Senatit dhe Kongresit Amerikan, duke raportuar për shkeljet e të drejtave të njeriut ndaj shqiptarëve që jetojnë në Luginën e Preshevës. Gjithashtu, ajo dhe delegacioni nga Lugina kanë ngritur këtë problematikë në Parlamentin Evropian dhe në Këshillin e Evropës gjatë një vizite në Strasburg.

Ajo theksoi: “Procesi i integrimit të Serbisë në BE duhet të kushtëzohet me garantimin dhe respektimin e të drejtave të shqiptarëve në Serbi, veçanërisht në komunat e Preshevës, Medvegjës dhe Bujanocit.”

E falënderojmë Kryetaren Sinani që ndau kohën për të qenë me ne sot. Prania dhe angazhimi i saj për Preshevën janë një frymëzim për të gjithë ne dhe dëgjuesit tanë. Besojmë se vizioni dhe përkushtimi i saj për komunitetin shqiptar do të sjellin ndryshime pozitive për qytetarët dhe të rinjtë e Preshevës. Kemi qenë me fat të dëgjonim mendimet e saj sot, dhe i urojmë suksese në çdo hap për të mirën e qytetarëve dhe të gjithë shqiptarëve në Luginën e Preshevës.

Moderatorë:

Fatos Kryeziu, M.A

Anjeza Llubani, Dott. Dott., mag